Fróðlegt í miðlum
Rætt við Ingibjörgu Svölu Jónsdóttur í Morgunútvarpinu
„Skógrækt er ekki alltaf sjálfsögð sem loftslagsaðgerð,“ nefndi Ingibjörg Svala Jónsdóttir prófessor í vistfræði við HÍ fyrir nokkru í blaðagreinum og taldi jafnframt að ef ekki yrði rétt að málum staðið væri hætt við að ný og oft ófyrirséð vandamál skapist. Morgunútvarpið tók aftur upp þráðinn með Ingibjörgu Svölu í kjölfar umræðunnar um verkefnið sem Carbon Yggdrasill stendur að við Saltvík í Norðurþingi.
Viðtalið hefst 00:31:18 inn í upptökuna.
Eru framkvæmdir í Saltvík loftslagsvænar?
Ólafur S. Andrésson skrifar: Framkvæmdir Yggdrasils í Saltvík hafa þau meginmarkmið að binda koltvísýring (CO2) úr lofti og vinna þannig gegn lofslagshlýnun. Færa má rök fyrir því að framkvæmdirnar geri svo alls ekki, heldur þvert á móti! Auk þess valda þær skaða á verðmætri náttúru.
Lággróður betri en skógur til kolefnisbindingar sé horft til lengri tíma
Anna Guðrún Þórhallsdóttir, prófessor í landnýtingu, segir að þegar horft er til langs tíma sé lággróður líkt og sá sem plægður var burt í Saltvík við Húsavík betri til bindingar á kolefnum en skógur. Sérstaklega þar sem endurplanta þurfi slíkum skógum á 50 til 70 ára fresti til þess að hámarka kolefnisbindingu.
Sjá einnig í fréttum sjónvarpsins: Raska landi fyrir kolefnisjöfnun
Bann við grænþvotti 2026
Þann 17. janúar sl. samþykkti Evrópuþingið nýja tilskipun um neytendamál þar sem lagt er bann við að markaðssetja vörur og þjónustu með villandi upplýsingum um kolefnisjöfnun. Þessa tilskipun eiga lönd evrópska efnahagssvæðisins að innleiða í sína löggjöf ekki síðar en 2026.
![Kolefnisjofnun-gardyrkjumanna Kolefnisjafnaður fluttningabill](https://natturuvinir.is/wp-content/uploads/2024/04/Kolefnisjofnun-gardyrkjumanna-scaled-e1713031983992-1024x596.jpeg)
Þetta ætti að binda enda á þann grænþvott sem átt hefur stað hjá mörgum íslenskum fyrirtækjum í samvinnu við Kolvið. Það er hægt að kaupa gróðursetningu trjáa hjá Kolviði, og þar með framtíðar kolefnisbindingu, en það þýðir ekki að kaupandinn hafi kolefnisjafnað starfssemi sína. Flutningabíllinn hér að ofan hefur ekki verið kolefnisjafnaður!
Aukin meðvitund um þetta hefur orðið til þess að t.d. Icelandair hefur lagt niður reiknivél sína um kolefnisjöfnun flugferða og Toyota hefur lokað síðunni Sporlaus þar sem sagt var að kaupendur hybrid-bíla gætu notið þess að aka án þess að skilja kolefnisspor eftir sig. Vonandi mun Stjórnarráðið gera hið sama á þessu ári eftir ábendingu VÍN um grænþvott síðustu ára.
Rétt er að taka það fram að Kolviður notar ekki lengur hugtakið kolefnisjöfnun i markaðssetningu. En viðskiptavinirnir verða líka að hætta að gera það. Sölufélag garðyrkjumanna vinnur sjálfsagt vel að umhverfismálum en staðhæfingar þeirra um kolefnisjöfnun standast ekki skoðun.
Sigfús Bjarnason
sigfus@natturuvinir.is